قصيدة الشمعه

قصيدة الشمعه

......

يا لب قلب(ن) يشوف بعيني الدمعة
ويحزن على الدمع ماكنه مبكيني
يا بايع الشمع قلي ليه هالشمعة
مرة تنور وعشر (ن) تحترق فيني
ماأدري خذاني وراها بارق اللمعة
ولا دفاها وشمع(ن) ذاب في يديني
يازينة الكون يامزيونة السمعة
ياجملة الورد ياخلاصة بساتيني
يامجمع النحل ياكراسة اللسعة
أحلى عسل والعسل اسمه يكفيني
لعيونها كاش أدفع زايد(ن) دفعه
ولشفاتها يرقص القلب وشراييني
مورّدة خد وسط ورودها بقعة
غمازتين (ن)تضيع بها عناويني
أهدابها مع حواجبها كذا جَمعه
مكحولة العين من نظرة تداويني
أعد الأعداد من واحد إلى تسعه
والعاشر أعجز أقوله ناظرت فيني
صغير سن(ن) ولكن راكبة سبعة
لا مالت بخصرها قامت شياطيني
لوغبت عنها أحس بداخلي صفعة
تهزني من شعر راسي لرجليني
لو الفراق آدمي لابد من لفعة
تبعده عن دربي اللي به مواذيني
لاتحسب السبت ناسي ليلة الجمعة
ولا الخميس استحى من يوم الإثنيني
الحب فزعة وأنا طلاب للفزعه
يما الإجابة نعم ولا تناسيني
شمعتك تحرق وأحب إحراق هالشمعة
يمكن عشان إنها بالحرق تدفيني .